mire dil ne di hai tujhe sada main ka.i dinon se udaas huun
tu ka.i dinon se nahin mila main ka.i dinon se udaas huun
dil-e-muztarib mire paas tha mujhe gham azal se hi raas tha
main ka.i dinon se udaas tha main ka.i dinon se udaas huun
vo uTha to zauq-e-talab uTha mire dil se rang-e-tarab uTha
ye ḳhizan ke din mire rab uTha main ka.i dinon se udaas huun
tu riyaz-e-hast se phuul chun mire dil men ab fana ki dhun
mujhe tujh se hona hai ab juda main ka.i dinon se udaas huun
vo jo aarzu ki rafiq ho jo rafiq-e-dard-e-amiq ho
mujhe de de aisi koi dava main ka.i dinon se udaas huun
tu mire mizaj ka phuul hai tu nahin to aankh fuzul hai
tu nazar ki jhiil men jhilmila main ka.i dinon se udaas huun
jahan ab hai malba paḌa hua yahan pahle koi nagar bhi tha
mira ghar nahin mujhe mil raha main ka.i dinon se udaas huun
miri aankh husn-parast hai mire gird shaam ka dasht hai
koi taq-e-dil men jala diya main ka.i dinon se udaas huun
Leave a Reply