tiri chahat ki aadi ho ga.i huun
hatheli tu main mehndi ho ga.i huun
kisi ke vaste taaza ghazal huun
tiri ḳhatir kahani ho ga.i huun
duaon men mujhe vo mangta hai
idhar main bhi namazi ho ga.i huun
mujhe qismat pe apni hai bharosa
mila jo us pe raazi ho ga.i huun
suna jo zauq paḌhne ka hai us ko
main sar-ta-pa kitabi ho ga.i huun
mire dariya hui jab zam main tujh men
samundar se bhi gahri ho ga.i huun
sitaron se kiya jab istifada
usi din se shahabi ho ga.i huun
tiri nazron ne dekha mujh ko jis dam
haya se main gulabi ho ga.i huun
bichhaḌ kar tujh se ai ‘zaryab’ ab to
main har jazbe se aari ho ga.i huun
Leave a Reply