har ek raah se aage hai ḳhvab ki manzil
tire huzur se baḌh kar ghayab ki manzil
nahin hai aap hi maqsud apna jauhar-e-zat
ki aftab nahin aftab ki manzil
kuchh aisa ranj diya bachpane ki ulfat ne
phir us ke ba.ad na aa.i shabab ki manzil
musafiron ko barabar nahin zaman-o-makan
hava ka ek qadam aur habab ki manzil
mohabbaton ke ye lamhe daregh kyuun kiije
bhugat hi lenge jo aa.i hisab ki manzil
milegi bada-gusaron ko shaiḳh kya jaane
gunah ki raah se ho kar savab ki manzil
masam naach rahe hain muamlat ke liye
guzar ga.i hai saval-o-javab ki manzil
mili jo aas to sab marhale hue asan
nahin hai koi bhi manzil sarab ki manzil
mizaj-e-dard ko asudgi se raas karo
kahan milegi tumhen iztirab ki manzil
rah-e-junun men talab ke siva nahin ‘sayyad’
agarche tai ho ḳhuda ki kitab ki manzil
Leave a Reply