Tu Jo Kahta Hai Bolta Kya Hai

Poet

tu jo kahta hai bolta kya hai

amr-e-rabbi hai ruh-e-maula hai

jab talak hai juda tu hai qatra

bahr men mil gaya to dariya hai

fil-haqiqat koi nahin marta

maut hikmat ka ek parda hai

aur shari.at ki puchhta hai tu yaar

vahdahu la-sharik yakta hai

haiga vahm-o-qayas se bahar

vo na tujh sa hai aur na mujh sa hai

jahan ho jo kaho sami-o-basir

sab ko dekhe hai sab ki sunta hai

nazar aata nahin vo a.ama ko

varna us ka zuhur sab ja hai

var tariqat ka tu kare hai saval

so to kahta huun gar samajhta hai

ghair-e-haq ke na dekh ghair taraf

dida-e-dil jo tera biina hai

baat sunta hai to usi ki sun

gar tariqat se tujh ko bahra hai

us ke tu zikr bin na kar kuchh zikr

gar dahan men zaban-e-goya hai

haath se kaam bhi usi ka kar

paanv se chal jo raah us ka hai

kaam is men baḌa hai nafs-kushi

ho sake to ajab tamasha hai

ma.arifat puchh kya hai aarif se

jis ko irfan hai so to gunga hai

jis ne paaya use so hai ḳhamosh

jis ne paaya nahin so bakta hai

aap hi aap hai jahan dekho

kullo-shai.in muhit-e-paida hai

ishq ka martaba hai sab se buland

sar se pahle qadam guzarta hai

jo hua sirr-e-ishq se agah

aage marne se aap marta hai

jo fana ho hua baqa-billah

kab use zindagi ki parva hai

us ko har aan har qadam har dam

az sura sair ta-surayya hai

ramz-e-tauhid ko samajh kar bol

gar tu sahib-shu.ur-o-dana hai

vo na samjhega ye suḳhan ‘hatim’

jis ko jahl aur ḳhayal-e-sauda hai