is dil ko ham-kanar kiya ham ne kya kiya
dushman ko dost-dar kiya ham ne kya kiya
rahta yahi hai dil men shash-o-panj-e-yar se
aina kyuun do-char kiya ham ne kya kiya
mutthi bharam ki ghuncha-sifat is chaman men khol
asrar ashkar kiya ham ne kya kiya
dar-parda dosti hui ham apne haq men aah
mutrib-pisar ko yaar kiya ham ne kya kiya
islam bhi ba-jabr tha ai shaikh-o-barhaman
kyuun jabr ikhtiyar kiya ham ne kya kiya
tasbih to padi thi gale ek dusri
zunnar ko bhi haar kiya ham ne kya kiya
dil ko dukha ke chin-e-jabin-e-pari-vashan
juun barq be-qarar kiya ham ne kya kiya
kahne laga vo qabr pe ashiq ki kyuun guzar
sahvan sar-e-mazar kiya ham ne kya kiya
haihat ashna the jo mauj-e-bala ke pech
un ka na intizar kiya ham ne kya kiya
bahr-e-jahan se dida-o-danista juun hubab
ba-chashm-e-tar guzar kiya ham ne kya kiya
dasht-e-junun se tod ke rishte ko jeb ke
daman bhi taar kiya ham ne kya kiya
us sarv-qad ke ishq men ye phal mila ‘nasir’
har sad aah vaar kiya ham ne kya kiya