Nakhshab Jaarchawi
aap to ghabra ga.e betabi-e-dil dekh kar
kya kahenge banda-parvar ahl-e-mahfil dekh kar
main to huun parda-e-aghosh-e-tufan-e-fana
ḳhud Dubo deta huun kashti qurb sahil dekh kar
ik nigah-e-lutf ki muhtaj hai tamir-e-ishq
aap kyuun ghabra ga.e TuuTa hua dil dekh kar
vo bhi ‘naḳhshab’ be-ḳhudi-e-dil se asan ho gaya
dard jo baḳhsha gaya tha ham ko mushkil dekh kar
Leave a Reply