Naushad Ali
uljhe to sab nasheb-o-faraz-e-hayat men
ham the ki un ki zulfon ke ḳham dekhte rahe
jab ghar jala tha mera vo manzar ajiib tha
dekha nahin jo tum ne vo ham dekhte rahe
vo sahib-e-qalam na vo ab sahiban-e-saif
kya ho ga.e hain saif o qalam dekhte rahe
ham tishna-kam jam-e-tahi le ke haath men
saaqi ka mai-kade men bharam dekhte rahe
pahunche sanam-kade men to hairat na kam hui
kitne badal ga.e hain sanam dekhte rahe
bas dekhte hi dekhte ‘naushad’ kya kahen
suraj ghurub ho gaya ham dekhte rahe
Leave a Reply