kisi ke hijr men qurban raat karte hue
kaTa hai vaqt sitaron se baat karte hue
vo kya Darega na.i vardat karte hue
hamen guzarna hai ḳhud ehtiyat karte hue
kisi ke ḳhvab uTha.e kisi ki ankhon ne
kisi ko dekha hai palkon ko haath karte hue
ye rah-e-ishq hai is men bala ki phislan hai
sambhal sambhal ke chalo ehtiyat karte hue
bata.un kya ki main pahuncha huun kis tarah tum tak
na-mumkinat ko bhi mumkinat karte hue
vo ek chand ki jis ko zamin pe laana hai
nikal raha huun main galiyon men raat karte hue
mubahison se bahut tang aa gaya hai ‘pavan’
suna de ab tu saza iltifat karte hue
Leave a Reply