Poet
hue ḳhalq jab se jahan men ham havas-e-nazara-e-yar hai
Thahar ai ajal ki vo a.enge dam-e-vapsin ka qarar hai
rahen mahv kyuun na har ek dam ki nazar men jalva-e-yar hai
dil-e-muntazir hai jo aa.ina to ḳhayal a.ina-dar hai
ye ḳhata-e-ishq ki di saza ki mizha se mardum-e-chashm ne
mira dil dikha ke ye kah diya ise lo ye qabil-e-dar hai
ye ḳhuda hi jaane vo kaun tha jo shahid-e-naz-o-ada hua
ki uḌi hai ḳhak-e-rah-e-sanam to ḳhizan men rang-e-bahar hai
huiin tark saari mohabbaten mire sar pe Dhaa.i hain afaten
yahi dil ke lene men shart thi yahi mujh se qaul-o-qarar hai
ye junun ki dekhiye puḳhtagi jo kabhi kisi ne na ho suni
mire pairahan ka jo taar hai vo har ek resha-e-ḳhar hai
koi dil ki nikli na aarzu hua ranj-o-gham se jigar lahu
phire ḳhaak chhante ku-ba-ku na to sabr hai na qarar hai
pas-e-marg bhi hain vahi sitam hain jafa.en ruuh pe dam-ba-dam
idhar aate aate vo phir ga.e jo suna ki mera mazar hai
mire siine ko na hadaf karo tapish-e-jigar se Dare raho
par-e-murgh-e-tir na jal uThen ki lahu ba-rang-e-sharar hai
vo ḳhushi dikha.i na charḳh ne ki evaz men jis ke na gham diye
kabhi farsh-e-gul hai jo ek shab to mahinon bistar-e-ḳhar hai
jise dard-e-nala-o-ah hai jo shahid-e-tegh-e-nigah hai
shab-e-hijr us ki gavah hai vo ‘habib’-e-sina-figar hai
Leave a Reply