ajiib Dhang se main ne yahan guzara kiya
ki dil ko barf kiya zehn ko sharara kiya
mizaj-e-dard ko sab lafz bhi qubul na the
kisi kisi ko tire gham ka isti.ara kiya
phir us ke ashk bhi us ko ada na kar paa.e
vo dukh jo us ke tabassum ne ashkara kiya
ki jaise aankh ke lagte hi khul ga.iin ankhen
nigah-e-jan ne bahut duur tak nazara kiya
hamen bhi dekh ki tajsim-e-nau se guzre hain
badan ko shisha kiya dil ko sang-para kiya
ajab mizaj tha tanha.i-ashna ki ‘sa.ud’
ḳhud apna saath bhi mushkil se hi gavara kiya
Leave a Reply