Fitrat Ansari
un ka mansha hai na phaile ḳhas-o-ḳhashak men aag
atish-e-dil na laga dida-e-namnak men aag
barq-e-gham ban ke jo ehsas-e-nazar phunk ga.i
is qadar thi tire ik jumla-e-be-bak men aag
sho.ala-e-mai ki navazish hai to lag ja.egi
saz-e-hasti ke har ik naghma-e-napak men aag
un ke angan men bhi angare baras ja.enge
ah-e-sozan na laga daman-e-aflak men aag
qafile aur bhi manzil ki taraf aate hain
tum sar-e-rah dabao na abhi ḳhaak men aag
shukr hai us ki tamanna hui puuri yarab
tere divane ki muddat se rahi taak men aag
chashm-e-fitrat se Tapakta hai mohabbat ka jalal
phail jaa.e na kahin alam-e-idrak men aag
Leave a Reply