Arsh Sahbai
aarzu raqs men hai vaqt ki avaz ke saath
zindagi naghma-sara hai na.e andaz ke saath
zindagi dekh na yuun ajnabi andaz ke saath
ham ko nisbat hai tiri chashm-e-fusun-saz ke saath
us ke mazkur se labrez hain naghme us ke
us ne marghub kya dil ko kis e.ajaz ke saath
ye haqiqat men zamane ki ḳhabar rakhte hain
sahme sahme se hain jo hasrat-e-parvaz ke saath
dil hai sar-e-chashma-e-naghmat agar TuuT gaya
kitne naghmat bikhar ja.enge us saaz ke saath
vaqt ki baat hai ab koi nahin un ka vaqar
jo kabhi baat bhi karte the baḌe naaz ke saath
kya kahen ban ga.e ham sab ki nazar ka markaz
us ne kya dekh liya ajnabi andaz ke saath
‘arsh’ jo dard men Duube hue dil se nikle
chand sho.ale bhi lapakte hain is avaz ke saath
Leave a Reply