Taashshuq Lakhnavi
apni farhat ke din ai yaar chale aate hain
kaifiyat par gul-e-rukhsar chale aate hain
pad gai kya nigah-e-mast tire saaqi ki
ladkhadate hue mai-khvar chale aate hain
yaad kiin nashsha men duubi hui ankhen kis ki
ghash tujhe ai dil-e-bimar chale aate hain
raah men sahib-e-iksir khade hain mushtaq
khaksaran-e-dar-e-yar chale aate hain
baagh men phuul hanse dete hain bedardi se
nala-e-murgh-e-giraftar chale aate hain
dekh kar abru-e-khamdar phire yuun ashiq
ghul hai khaae hue talvar chale aate hain
jis tarah narghe men chalte hain ghazal-e-sahra
yuun tiri chashm ke bimar chale aate hain
huun vo be-khud ki ye hai nala-e-sozan pe guman
shoala-e-atish-e-rukhsar chale aate hain
chahiye shor-e-qayamat pae-taazim utthe
aap ke ashiq-e-raftar chale aate hain
shor sunte hain jo ham chak-garebanon ka
band khole sar-e-bazar chale aate hain
har taraf hashr men jhankar hai zanjiron ki
un ki zulfon ke giraftar chale aate hain
chal gai tegh-e-nigah aaj ‘taashshuq’ pe zarur
log us kucha se khun-bar chale aate hain
Leave a Reply