ahd hazir men ayar-e-sub.h to badla magar
ai andheri raat tujh ko bhi badalna chahiye
bavajud-e-gham musalsal qahqahe ai na-murad
karvan-e-zindagi ke saath chalna chahiye
shan-e-rindana ki hai tauhin az-ḳhud-raftagi
sahl hai piina magar pi kar sambhalna chahiye
zindagi vo kya jo hai na-vaqif-e-ashob-e-ishq
sina-e-adam men tufanon ko palna chahiye
iqtiza-e-asr-e-nau hai zindagi to darkinar
maut ko bhi husn ke sanche men Dhalna chahiye
ai junun kuchh der shaghl-e-ḳhak-bazi hi sahi
dil to is sahra-e-hasti men bahalna chahiye
Leave a Reply