Nawed Fidaa Sattii
dava asar nahin rakhti dua qubul nahin
ye kaise log hain jin ko ḳhuda qubul nahin
mira bhi dil nahin lagta ghane makanon men
use bhi shahr ki ab-o-hava qubul nahin
pahunch to sakta huun manzil pe aap se pahle
magar main kya karun jab rasta qubul nahin
ki jis se sher men ma.ani ka iltava hi na ho
suḳhan ke baab men vo tajraba qubul nahin
main vo faqir huun jis ko dilon ke taqchon men
ḳhuda qubul hai ḳhauf-e-ḳhuda qubul nahin
vo husn hai use zeba tamam raz-o-niyaz
main ishq huun mujhe shikva gila qubul nahin
dil-o-dimagh pe taari hai us ka ishq ‘fida’
dil-o-dimagh ko duniya bhi na-qubul nahin
Leave a Reply