kuchh be-nam ta.alluq jin ko naam achchha sa dene men
main to saari bikhar ga.i huun ghar ko ikaTTha rakhne men
da.era manafi musbat ka to apni jagah mukammal hai
koi barqi-rau dauḌa de is be-jan se naate men
kaun ehsas ki lau baḳhshega rukhe-phike manzar ko
kaun piro.ega jazbon ke moti harf ke dhage men
aisa kya andher macha hai mere zaḳhm nahin bharte
log to paara paara ho kar juḌ jaate hain lamhe men
ranj ki ik be-mausam Tahni dil se yuun paivasta hai
puuri shaḳh hari ho jaa.e ek sira chhu lene men
uupar se ḳhamoshi oḌh ke phirte hain jo log vahi
dhajji dhajji phirte hain andar ke pagal-ḳhane men
sailabon ki ret se jis ko tu ne abas namnak kiya
dhire bahta ik dariya ban us sahra ke siine men
barish ek paḌe to bahar aape se ho jaati hai
jis maḳhluq ne ankhen kholin dharti ke tah-ḳhane men
Leave a Reply