Anjum Fauqi Badayuni
yuun to sab duniya men duniya har-ik mahfil men hai
main huun jis duniya men vo duniya tumhare dil men hai
is haqiqat se bhi ai arbab-e-sahil hoshiyar
ek na-malum tufan parda-e-sahil men hai
be-ḳhabar hain qafile vaale abhi is raaz se
manzil-e-maqsud rahon men nahin hai dil men hai
main ne hi kuchh soch kar us ko bata di rah-e-dost
varna is manzil men kab tha ishq jis manzil men hai
tum miri janib agar dekho to main kuchh bhi nahin
main agar dil ki taraf dekhun to sab kuchh dil men hai
ab to ‘anjum’ saari duniya gosh-bar-avaz hai
kah bhi do mard-e-ḳhuda jo kuchh tumhare dil men hai
Leave a Reply