Husn Ke Danke Ki Dhum Jag Mein Padi Ja-Ba-Ja

husn ke danke ki dhuum jag men padi ja-ba-ja

kyuun na baje dil mane ishq ki naubat sada

ashiq-e-be-jan ne aaj dil sati ai ruh-bakhsh

tujh kuun kaha dekh kar jaan baya marhaba

bulbul-e-shiraz ne chhod diya ishq-e-gul

ghuncha-dahan ko suna baat men jab khush-ada

sarv hua hai khada teri tavazoa katin

jab siin suna baagh men qad ko tire dil-ruba

tera daras paane ko daud kar aaya chakor

buujh tire chehre ko ghairat-e-badrudduja

shauq ka nazuk darakht khushk hua dard suun

husn ke bustan men tu chup se hua bevafa

baagh men laala kahe dekh ke nargis taraf

chashm ka bimar ho kyunki khada be-asa

laaf na maar ai raqib majlis-e-ushshaq men

dil mane begana hai tujh sati vo ashna

phuul gaya sungh main tere badan ki so baas

ho ke tire paas jab mujh kane aaya saba

bas-ki tire aane ki baagh mane thi khabar

shauq se be-ikhtiyar gul ne kaha hal-ata

mauj-e-havadis sati mujh kuun nahin gham kabhi

kashti-e-hasti upar bas-ki tu hai nakhuda

taan tire munh se sun vajd kare tansen

pakde apas kaan kuun jab vo sune kanhra

yaad suun teri jo dil khali-o-ghafil hai nit

us dil-e-be-hosh ka naam hai bait-ul-khala

kucha-e-sarbasta-e-zulf men hairan hove

ishq-e-siyah-chashm ka jis ka hove rahnuma

aankh tiri sahar ko phande men de hiran kuun

zulf tiri pech suun dil ko deve hai phansa

mujmar-e-sina mane kyuun na jale jiyun sipand

dil kuun lagi chatpati jab se hua tuun juda

ishq ke bimar kuun kaam tabiban suun naiin

vasl ki tabrid bin aur nahin hai dava

haal mire dard ka puchh kabhi aan kar

lutf ke qanun se mujh kuun milegi shifa

teri kamar dekh kar dang hain barik-bin

kyuun na hove mu-ba-mu tujh pe fida ‘mubtala’

Leave a Comment