Poet
hamari maut ka vahid hai ye gavah badan
nahin hai ruuh pe koi bhi zaḳhm-gah badan
hamari aankh se zahir ho raushni kaise
hamare samne rakkha gaya siyah badan
jo gunge logon ki basti men koi naam liya
suna.i dene lage mujh ko be-panah badan
hamari ruuh pe nashtar chubhe udasi ke
hazar aahon pe matam-kada hai aah badan
use mare hue ghanTe guzar ga.e kitne
ab aage kya hai nahin hai agar tabah badan
main us pe naqsh bana.ungi apni vahshat ke
na.i nikalungi tujh se main koi raah badan
main andhe logon men shamil huun un ke jaisi huun
so ek shart hi rakkhi ga.i nibah badan
Leave a Reply