Nivesh Sahu
apni ghairat ke alava kahin dekhe na ga.e
ḳhud se nikle the magar ghair ke pichhe na ga.e
tum ko afsos tumhen Thiik banaya na gaya
aur ek ham ke abhi chaak pe rakkhe na ga.e
ik sitam ye ke hamen vasl men aaya na sukun
ik sitam ye ke tire hijr bhi dekhe na ga.e
sang us ke to mohabbat men saliqe se kaTi
ba.ad us ke bhi badan se ye saliqe na ga.e
tere aane pe kahan sar pe uTha lete the ghar
tere jaane pe tire pichhe dariche na ga.e
us ki ḳhushbu ko bhi ruḳhsat na kiya jaata tha
ham se kuchh roz to kapḌe bhi utare na ga.e
Leave a Reply