Afzal Parvez
vaqt ke tufani sagar men krodh kapat ke rele hain
lekin aas ke manjhi har lahza maujon se khele hain
pag pag kante manzilon sahra koson jangal bele hain
safar-e-zist kathin hai yaaro raah men laakh jhamele hain
alakh jamae dhuni ramae dhyan lagae rahte hain
pyaar hamara maslak hai ham prem-guru ke chele hain
rahzanon se ghabra kar sab sathi sangat chhod gae
aur pur-khauf dagar par garm-e-safar ham aaj akele hain
husn ki daulat us ki hai aur vasl ki ishrat bhi us ki
jis ne pal pal hijr men kaata jaur sahe dukh jhele hain
bazi-gah-e-dar-o-rasan men mai-kada-e-fikr-o-fan men
ham rindon se raunaq hai ham durveshon se mele hain
jivan ki komal abla ka svayamvar rachne vaala hai
aao sala-e-am hai sab ko jitne bhi albele hain
Leave a Reply