Meri Taqdir Muafiq Na Thi Tadbir Ke Sath

meri taqdir muafiq na thi tadbir ke saath

khul gai aankh nigahban ki bhi zanjir ke saath

khul gaya mushaf-e-rukhsar-e-butan-e-maghrib

ho gae shaikh bhi hazir nai tafsir ke saath

na-tavani miri dekhi to musavvir ne kaha

Dar hai tum bhi kahin khinch aao na tasvir ke saath

ho gaya tair-e-dil said-e-nigah-e-be-qasd

sai-e-bazu ki yahan shart na thi tiir ke saath

lahza lahza hai taraqqi pe tira husn-o-jamal

jis ko shak ho tujhe dekhe tiri tasvir ke saath

baad sayyad ke main college ka karun kya darshan

ab mohabbat na rahi is but-e-be-pir ke saath

main huun kya chiiz jo us tarz pe ja.un ‘akbar’

‘nasikh’ o ‘zauq’ bhi jab chal na sake ‘mir’ ke saath

Leave a Comment