Anjum Irfani
tesha-ba-kaf ko a.ina-gar kah diya gaya
jo aib tha use bhi hunar kah diya gaya
saaya hai pyaar ka na mohabbat ki dhuup hai
divar ke hisar ko ghar kah diya gaya
in ke har ek goshe men sadiyan muqim hain
TuuTi imaraton ko khanDar kah diya gaya
ḳhuddari-e-ana hai na pindar-e-zist hai
shanon ke saare bojh ko sar kah diya gaya
angan men har makan ke andheron ka raaj hai
mahlon ki raushni ko sahar kah diya gaya
kuchh ḳhauf-e-jan hai aur na kuchh fikr-e-hijr-e-yar
ḳhush-gamiyon ko ranj-e-safar kah diya gaya
hairat darogh maslahat-amez par ho kya
be-barg jhaḌiyon ko shajar kah diya gaya
dekha kahan hai aag ke dariyaon ka safar
jugnu uḌe to raqs-e-sharar kah diya gaya
kuchh ehtiram-o-husn-e-aqidat ke josh men
har naqsh ab-e-naqsh-e-hajar kah diya gaya
khul ja.ega bharam tiri mizan-e-adl ka
do ek harf-e-jurm agar kah diya gaya
na-ashna-e-naqsh-e-kaf-e-pa-e-am hai
vo rasta bhi rahguzar kah diya gaya
yuun ḳhush hain jaise vaqi.atan ho ga.e ḳhuda
majburiyon ke zer-e-asar kah diya gaya
‘anjum’ yahan tak aane men kya kya guzar ga.i
mohr-e-sar-e-mizha bhi guhar kah diya gaya
Leave a Reply