Rasheed Lakhnavi
gardish-e-chashm hai paimane men
tum ga.e ho kabhi maiḳhane men
ek jalva sa nazar aata hai
koi to hai mire gham-ḳhane men
yuun hai siine men dil-e-pur-hasrat
qabr jaise kisi virane men
saz-e-nairang hai meri zanjir
na.i avaz hai har daane men
dekh ai dil na mujhe chhoḌ ke ja
farq aa ja.ega yarane men
jal ke ashiq hue ma.ashuq sifat
sham.a ka soz hai parvane men
jaan us but men lagi rahti hai
apne ko paate hain begane men
be-ḳhudi ne na kahin ka rakkha
ham hain basti men na virane men
sang-e-dar tak tire jab sar pahuncha
laakh sajde kiye shukrane men
nahin ma.alum gaya kis janib
dil laga hai tire divane men
qissa-e-hazrat-e-yusuf na suno
turfa ibrat hai is afsane men
hal-pursi nahin karta koi
bekasi hai mire gham-ḳhane men
is tarah dil men hai aahon ka dhuan
jaise ḳhaak uḌti hai virane men
barakat kis ke qadam ki hai ‘rashid’
ki azaan hoti hai but-ḳhane men
Leave a Reply