ehsas-e-na-rasa.i se jis dam udaas tha
shayad vo us ghaḌi bhi mire aas paas tha
mahfil men phuul ḳhushiyon ke jo banTta raha
tanha.i men mila to bahut hi udaas tha
har zaḳhm-e-kohna vaqt ke marham ne bhar diya
vo dard bhi miTa jo ḳhushi ki asaas tha
angḌa.i li sahar ne to lamhe chahak uThe
jangal men varna raat ke ḳhauf o hiras tha
suraj pe vaqt ka jo gahan lag gaya ‘hanif’
dekha to mujh se saaya mira na-shanas tha
Leave a Reply