bhar diin shabab ne ye un ankhon men shoḳhiyan
til bhar bhi ab jagah nahin un men haya ki hai
phenk aa.e us ko ja ke vo ku-e-raqib men
miTTi ḳharab mere dil-e-mubtala ki hai
deta huun dil ḳhushi se miri jaan chhoḌiye
is ko na lijiye ye amanat ḳhuda ki hai
tauba na munh laga.egi rindon ko duḳht-e-raz
qalib men us ke ruuh kisi parsa ki hai
tere hina.i haath tak un ko hai dastaras
ai rashk-e-gul chaman men ye qismat hina ki hai
lakhon shahid-e-naz ga.e hain jahan se
mulk-e-adam men dhuum tumhari jafa ki hai
choTi ke sher tu ne kahe is zamin men
sach hai ‘vasim’ teri tabi.at bala ki hai
Leave a Reply