Poet
ik shaḳhs ko suna tha kabhi bolte hue
us roz se labon pe hain taale paḌe hue
ḳhali lifafe bhejte rahte hain ham use
almariyon men band hain sab ḳhat likhe hue
manzil se duur rahne ka dukh kis liye na ho
ik umr ho ga.i hamen ghar se chale hue
kalak chhupa.i ja na saki jin se soch ki
vo bhi pahan ke aa.e hain kapḌe dhule hue
shayad ikaa.i zehn ki taqsim ho ga.i
ham sher bhulne lage apne kahe hue
Leave a Reply