kho ga.i ghairat-e-dil zauq-e-talab baaqi hai
kaise mar ja.un ki jiine ka sabab baaqi hai
jalva-e-sub.h ka manzar hai gulistan men to kya
ashiyanon men abhi zulmat-e-shab baaqi hai
nashr ho ja.egi ḳhud kulfat-e-dauran ki hadis
tere sha.ir men agar jur.at-e-lab baaqi hai
husn aur ishq men ik ḳhaas hai rabt-e-ulfat
dil salamat hai to phir chashm-e-ghazab baaqi hai
kucha-e-ishq men dil aaj bhi hai sargardan
ab bhi vo shefta-e-ariz-o-lab baaqi hai
jab talak dahr men zinda hai zaban-e-urdu
raunaq-e-anjuman-e-sher-o-adab baaqi hai
gardish-e-vaqt ki raftar batati hai ‘saba’
chashmak-e-soz-e-alam saz-e-tarab baaqi hai
Leave a Reply