tumhari qabr par
main fatiha padhne nahin aaya
mujhe malum tha
tum mar nahin sakte
tumhari maut ki sachchi khabar jis ne udaai thi
vo jhuta tha
vo tum kab the
koi sukha hua patta hava se mil ke tuuta tha
miri ankhen
tumhare manzaron men qaid hain ab tak
main jo bhi dekhta huun
sochta huun
vo vahi hai
jo tumhari nek-nami aur bad-nami ki duniya thi
kahin kuchh bhi nahin badla
tumhare haath meri ungliyon men saans lete hain
main likhne ke liye
jab bhi qalam kaghaz uthata huun
tumhen baitha hua main apni hi kursi men paata huun
badan men mere jitna bhi lahu hai
vo tumhari
laghzishon nakamiyon ke saath bahta hai
miri avaz men chhup kar
tumhara zehn rahta hai
miri bimariyon men tum
miri lachariyon men tum
tumhari qabr par jis ne tumhara naam likha hai
vo jhuta hai
tumhari qabr men main dafn huun
tum mujh men zinda ho
kabhi fursat mile to fatiha padhne chale aana
Mubeen Ghafoor says
I can’t express my emotions 😠but aj dobara parh Kar ankhain NUM ho gai hain