Badiuzzaman Khawar
jale hain dil na charaghon ne raushni ki hai
vo shab-paraston ne mahfil men tirgi ki hai
hadis-e-zulm-o-sitam hai hanuz na-gufta
hanuz mohr zabanon pe ḳhamushi ki hai
us ek jaam ne saaqi ki jo ata Thahra
sukun diya hai na kuchh dard men kami ki hai
hamen ye naaz na kyuun ho ki nai-navaz hain ham
hamare honTon ne ijad naghmagi ki hai
chaman men sirf hamin razdan hain kanTon ke
gulon ke saath basar ham ne zindagi ki hai
firaq-e-yar ne baḳhshi hai vasl ki lazzat
ḳhayal-e-yar ne zulmat men raushni ki hai
hain jis ki diid se mahrum aaj tak ‘ḳhavar’
usi ki ham ne tasavvur men bandagi ki hai
Leave a Reply