vaqif ḳhud apni chashm-e-gurezan se kaun hai
manus ab mire dil-e-viran se kaun hai
kis ko ḳhabar hai kis ghaḌi ankhen chhalak paḌen
ab ashna tahayya-e-tufan se kaun hai
dekhen jise ḳhalal hai usi ke dimagh men
sarshar ab tasavvur-e-janan se kaun hai
vo zulm shahr men hai ki andher hai koi
vabasta rasm-e-jashn-e-charaghan se kaun hai
dekho jise vahi hai giraftar-e-arzu
ab duur is navah men zindan se kaun hai
maqtal men jis ko apne lahu se jalaya tha
pur-nur us ek sham-e-farozan se kaun hai
chehron ki zardiyon se ‘zafar’ ho muvazana
nazdik rang-e-dasht-o-bayaban se kaun hai
Leave a Reply