bhaTak rahe hain gham-e-agahi ke maare hue
ham apni zaat ko patal men utare hue
sada-e-sur-e-sarafil ki rasan-basta
palaT ke ja.enge ik roz ham pukare hue
shikast-e-zat shikast-e-hayat bhi hogi
ki ji na pa.enge ham hauslon ko haare hue
ai mere a.ina-ru ab kahin dikha.i de
ik umr biit ga.i ḳhal-o-ḳhad sanvare hue
mata-e-jan hain miri umr bhar ka hasil hain
vo chand lamhe tire qurb men guzare hue
zamin pe zarra-e-be-nam the magar ‘shahbaz’
bulandiyon pe pahunch kar hamin sitare hue
Leave a Reply