Hasan Akbar Kamal
us ik ummid ko to rahat-e-safar na samajh
hai raste men kahin saya-e-shajar na samajh
jo samne na raha us ka aks aankh men hai
ab itna ḳhali bhi ye kasa-e-nazar na samajh
jo ruuh men na utar jaa.e vo jamal nahin
jo dil-gudaz na kar de use hunar na samajh
nazar parakh dil-e-majruh nashtaron pe na ja
har aane vaale ko tu apna charagar na samajh
jo fasl-e-gul ki tamanna men ho ga.e barbad
vo ba-murad hain gham un ka be-samar na samajh
har ek ghar men na jab tak charagh jal jaa.e
‘kamal’ raushan-o-abad apna ghar na samajh
Leave a Reply