Sarvat Husain
raat baghiche pe thi aur raushni patthar men thi
ik sahife ki tilavat zehn-e-paighambar men thi
aadmi ki band muTThi men sitara tha koi
ek jadui kahani sub.h ke mantar men thi
ek raḳhsh-e-sang tha atish-kade ke samne
ek niili mom-batti dast-e-ahan-gar men thi
biich men soi hui thi atish-e-a.indagan
ek pairahan ki ThanDak dhuup ki chadar men thi
paanv sakit ho ga.e ‘sarvat’ kisi ko dekh kar
ik kashish mahtab jaisi chehra-e-dilbar men thi
Leave a Reply