Balmohan Panday
samay se pahle bhale sham-e-zindagi aa.e
kisi tarah bhi udasi ka ghaav bhar jaa.e
ham ab udaas nahin sar-ba-sar udasi hain
hamen charagh nahin raushni kaha jaa.e
jo sher samjhe mujhe dad-vad deta rahe
gale laga.e jise gham samajh men aa jaa.e
ga.e dinon men koi shauq tha mohabbat ka
ab is azaab men ye zehn kaun uljha.e
kisi ke hansne se raushan hui thi bad-e-saba
koi udaas hua to gulab murjha.e
ye ek dukh hi daba rah gaya hai ankhon men
vo ek misra jise sher kar nahin paa.e
agar huun ghusse men phir bhi main chahta ye huun
main sirf hijr kahun aur phone kaT jaa.e
Leave a Reply