Kahne Sunne Se Meri Unki Adawat Ho Gai

Poet

kahne sunne se miri un ki adavat ho ga.i

jo na honi thi vo ghairon ki badaulat ho ga.i

roz aati hai magar ik roz bhi aati nahin

ai ajal tu bhi mire haq men qayamat ho ga.i

mere un ke ab kahan pahla tapak-e-ashiqi

chalte phirte mil ga.e sahab-salamat ho ga.i

samjhe the dasht-e-junun men kuchh bahal ja.ega dil

dekh kar sunsan jangal duuni vahshat ho ga.i

shakl dikhlati nahin shishe se aa ke jaam men

duḳhtar-e-raz tu to abhi se be-muravvat ho ga.i

marg-e-ashiq ka abas hai sog har dam is qadar

chhuT gaya vo qaid-e-gham se tum ko fursat ho ga.i

fasl-e-gul aa.i baḌhe josh-e-junun ke valvale

phir vahi ‘taslim’ apni ghair halat ho ga.i