Raees Warsi
jo dekho to vo chehra ajnabi hai
agar socho to vaj.h-e-zindagi hai
mujhe hai e’tiraf-e-jurm-e-ulfat
mujhe tum se mohabbat ho ga.i hai
miri ankhen luTati hain jo gauhar
mizaj-e-ishq men dariya-dili hai
masiha.i na tum se ho sakegi
hamara dard-e-ulfat da.imi hai
tira paikar ḳhayalon men basa hai
har ik su raushni hi raushni hai
hamen raas aa ga.i ḳhuban-parasti
baḌi dilkash hamari zindagi hai
tiri chahat ka hai ye bhi karishma
adu se bhi hamari dosti hai
mujhe mai-kash samajhta hai zamana
nigahon men ḳhumar-e-ashiqi hai
maza jab hai vo kah de be-ḳhudi men
qarar-e-jan ‘ra.is’-e-varsi hai
Leave a Reply