ḳhushbu-e-pairahan se sulagte rahe dimagh
aa.i shab-e-firaq to gul ho ga.e charagh
dil ki lagi bhaḌak ke nigahon tak aa ga.i
palkon pe sham-e-vasl jala.e hain dil ke daagh
us chashm-e-mai-farosh se hangam-e-nav-nosh
phuTa vo sail-e-nur ki lau de uThe ayagh
vo gul khilen ki jin ki mahak la-zaval ho
is ek din men ham ne saja.e hain kitne baagh
aḳhir khula ki tu hai mire ghar ki raushni
yuun to tire baghair bhi jalte rahe charagh
jab chashm-o-dil bujhe to shabistan-e-shauq men
ham ne hatheliyon pe jala.e hain shab charagh
jo vadi-e-jamal men gum ho ga.e ‘jamil’
apni talab ke saath hi un ka bhi kuchh suragh
Leave a Reply