mehrbani ko tiri ariz-e-taban samjhe
ruuTh jaane ko ḳham-e-kakul-e-pechan samjhe
sub.h-e-ḳhandan ko ma.al-e-shab-e-hijran samjhe
shab ko tanvir ka ik aks-e-pareshan samjhe
ziist ashuftagi-e-gor-e-ghariban samjhe
maut ko silsila-e-umr-e-gurezan samjhe
shoḳh kirnon ko dil-e-sina-figaran samjhe
kahkashaon ko hasin shahr-e-nigaran samjhe
haram-o-dair na jalva-gah-e-janan samjhe
kuchh na samjhe yahi ai gardish-e-dauran samjhe
kuchh samajh paa.e na ahbab ke samjhane se
vaqt ne puchha ki samjhe to kahan haan samjhe
saaf dil saada mizaj aisi tabi.at paa.i
ham to vaa.iz ko bhi ik banda-e-yazdan samjhe
jis ko kahte hain nasim aaj vo hai bad-e-sumum
aur kabhi fasl-e-ḳhizan ko bhi baharan samjhe
phuuT kar bahne lage aankh se naale shab-e-hijr
aur ham-sa.e use ne.amat-e-baran samjhe
rang laaya hai gulistan ki tamannaon ka ḳhuun
ham baḌi der men mafhum-e-baharan samjhe
Leave a Reply