be-shauq-e-talab be-zauq-e-nazar be-rang thi un ki gul-badani
ye kohkan-o-majnun ki nazar shirin bhi bani laila bhi bani
dekhe hue un ko der hui har naqsh abhi tak taaza hai
be-gana-vashi mastana-ravi jadu-nazari shirin-suḳhani
ham apne hi ghar men rahte the jab teri nazar men rahte the
ab roz satati hai ham ko ai dost vatan men be-vatani
phulon men jhalakte hain chehre shaḳhon pe guman aghosh ka hai
kuchh aisi basi hai nazron men gul-pairahani nazuk-badani
nazron men na be-mehri ki ada baton men na vo ḳhushbu-e-vafa
kitne hi dilon ko toḌ ga.i zalim ki jabin ki be-shikani
us bazm-e-tarab men hansne par majbur hamen qismat ne kiya
phulon se jahan sho.ale lapken saghar men ghule hiire ki kani
sho.alon men nikharte hain jauhar qismat pe ‘faridi’ tanz na kar
gham aisi hi ne.amat hai jis ko paate hain yahan qismat ke dhani
Leave a Reply