paanv men ḳhushbu ke zanjir bana.i jaa.e
aaj socha teri tasvir bana.i jaa.e
apni marzi se chale aa.en divane saare
ho kashish jis men vo zanjir bana.i jaa.e
bin kahe baat samajh le tu meri main teri
chal mohabbat men vo tasir bana.i jaa.e
qafile pyaas ke guzrenge isi raste se
sahra men paani ki tahrir bana.i jaa.e
ḳhvab to dekh liye tu ne bahut se ‘jyoti’
vaqt aaya hai ki ta.abir bana.i jaa.e
Leave a Reply