Taskin-E-Dil-E-Mahzun Na Hui Wo Sai-E-Karam Farma Bhi Gae

taskin-e-dil-e-mahzun na hui vo sai-e-karam farma bhi gae

is sai-e-karam ko kya kahiye bahla bhi gae tadpa bhi gae

ham arz-e-vafa bhi kar na sake kuchh kah na sake kuchh sun na sake

yaan ham ne zaban hi kholi thi vaan aankh jhuki sharma bhi gae

ashuftagi-e-vahshat ki qasam hairat ki qasam hasrat ki qasam

ab aap kahen kuchh ya na kahen ham raz-e-tabassum pa bhi gae

rudad-e-gham-e-ulfat un se ham kya kahte kyunkar kahte

ik harf na nikla honton se aur aankh men aansu aa bhi gae

arbab-e-junun par furqat men ab kya kahiye kya kya guzri

aae the savad-e-ulfat men kuchh kho bhi gae kuchh pa bhi gae

ye rang-e-bahar-e-alam hai kyuun fikr hai tujh ko ai saaqi

mahfil to tiri suuni na hui kuchh uth bhi gae kuchh aa bhi gae

is mahfil-e-kaif-o-masti men is anjuman-e-irfani men

sab jam-ba-kaf baithe hi rahe ham pi bhi gae chhalka bhi gae

Leave a Comment