kis liye phirte hain ye shams o qamar donon saath
kis ko ye DhunDte hain barhana-sar donon saath
kaisi ya-rab ye hava sub.h-e-shab-e-vasl chali
bujh gaya dil mira aur sham-e-sahar donon saath
ba.ad mere na raha ishq ki manzil ka nishan
miT ga.e rah-rau o rahguzar donon saath
ai junun dekh isi sahra men akela huun main
rahte jis dasht men hain ḳhauf-o-ḳhatar donon saath
mujh ko hairat hai shab-e-aish ki kotahi par
ya ḳhuda aa.e the kya sham-o-sahar donon saath
us ne pheri nigah-e-naz ye ma.alum hua
khinch gaya siine se tiir aur jigar donon saath
gham ko di dil ne jagah dil ko jagah pahlu ne
ek goshe men karenge ye basar donon saath
is ko rokun main ilahi ki sambhalun us ko
ki taḌapne lage dil aur jigar donon saath
naaz baḌhta gaya baḌhte ga.e juun juun gesu
balki lene lage ab zulf o kamar donon saath
tujh se matlab hai nahin duniya o uqba se gharaz
tu nahin jab to ujaḌ jaa.en ye ghar donon saath
baat sunna na kisi chahne vaale ki kabhi
kaan men phunk rahe hain ye guhar donon saath
andhiyan aah ki bhi ashk ka sailab bhi hai
dete hain dil ki ḳharabi ki ḳhabar donon saath
kya kahun zohra o ḳhurshid ka aalam ai ‘nazm’
nikle ḳhalvat se junhi vaqt-e-sahar donon saath
Leave a Reply