adu-e-jan but-e-be-bak nikla
bada qatil bada saffak nikla
sanobar qad-kashi men khaak nikla
vo sarv-e-qad chaman ki naak nikla
farishton ko kiya maat aadmi ne
qayamat ka ye musht-e-khak nikla
uda di qaid-e-mazhab dil se ham ne
qafas se tair-e-idrak nikla
mohabbat se khula hal-e-zamana
ye dil lauh-e-tilism-e-khak nikla
nikal aai falak ki duur se ruuh
bhanvar se khuub ye tairak nikla
vo pazhmurda tha fasl-e-gul jo aai
chaman se surat-e-khashak nikla
shikar-afgan main dil ko janta tha
ghazal-e-basta-e-fitrak nikla
mare ham aarzu un ki bar aae
hamara hausla kya khaak nikla
junun men bagh-e-alam ko jo dekha
ajab sahra-e-vahshat-nak nikla
nikalti hai badan se jis tarah ruuh
tire ghar se main yuun ghamnak nikla
tumhare qad se kuchh kam sarv thahra
sanobar to bahut kavak nikla
hamari sada-lauhi kaam aai
hisab-e-roz-e-mahshar paak nikla
tarara phirte hi pahuncha adam men
samand-e-umr kya chalak nikla
bhare ladkon ne daman pattharon se
jahan tera gareban chaak nikla
mitaya daur-e-saqi mohtasib ne
adu jamshed ka zahhak nikla
‘saba’ ham hashr ko mujrim jo nikle
shafaat ko shah-e-laulak nikla
Leave a Reply