Saleem Siddiqui
badan qubul hai uryaniyat ka maara hua
magar libas na pahnenge ham utara hua
vo jis ke surḳh ujale men ham munavvar the
vo din bhi shab ke ta.aqub men tha guzara hua
panah-e-gah-e-shajar fat.h kar ke soya hai
masafaton ki thakan se ye jism haara hua
mujhe zamin ki parton men rakh diya kis ne
main ek naqsh tha aflak pe ubhara hua
ḳharidne ke liye us ko bik gaya ḳhud hi
main vo huun jis ko munafe men bhi ḳhasara hua
sama gaya mire pairon ke ablon men ‘salim’
chalo ki aaj se ye ḳhaar bhi hamara hua
Leave a Reply