tamam abr pahaḌon pe sar paTakte rahe
gharib dahkan ke aansu magar Tapakte rahe
tamam mausam-e-barish isi tarah guzra
chhaten Tapakti rahin aur makin sisakte rahe
niharne ke liye jab na mil saka manzar
ham apni soḳhta-samaniyon ko takte rahe
makan ashkon ke sailab men Thahar na sake
makin palkon ki shaḳhen pakaḌ laTakte rahe
vo ham pe barf ka tufan ban ke TuuT paḌa
ham apne aap men sho.ala bane bhabhakte rahe
amiir logon ki basti men koi dar na khula
gharib log har ik dar pe sar paTakte rahe
‘navaz’ luqme pe luqma diya hai ham ne magar
mohabbaton ki tilavat men vo aTakte rahe
Leave a Reply