Bano Tahira Sayeed
kirdar hi se zinat-e-aflak ho ga.e
kirdar gir gaya ḳhas-o-ḳhashak ho ga.e
ham jaise sada-lauh ko duniya ke haath se
aisi saza mili hai ki chalak ho ga.e
shayad bahar aa ga.i mauj-e-junun liye
daman jo sil ga.e the vo phir chaak ho ga.e
kal tak dava-e-dard the kuchh log shahr men
aaj eqtidar kya mila zahhak ho ga.e
qismat ka tha mazaq ki ik husn-e-ittifaq
aa.i hamari yaad jab ham ḳhaak ho ga.e
un ki nazar ne ‘tahira’ aisa asar kiya
jo darmiyan hisab the sab paak ho ga.e
Leave a Reply