charon taraf hain ḳhar-o-ḳhas dasht men ghar hai baagh sa
choTi pe kohsar ki jalta hai kya charagh sa
ab-e-ravan ki guunj se shorish-e-ḳhak-o-bad tak
main hi huun naqsh-e-javedan main hi adam-suragh sa
sub.h bhi resha resha hai shaam bhi hai rafu-talab
sina-e-mahtab bhi varna hai dil-e-dagh sa
bahs hui na tabsira shor uTha na chup lagi
dil ki bisat thi hi kya TuuT gaya ayagh sa
sher kaho to chup rahe kuchh na kaho to chaunk uThe
shahr men ek ‘zubair’ hai sha.ir-e-kam-dimagh sa
Leave a Reply