daur-e-sabuhi shola-e-mina raqsan chhanv men taron ki
pir-e-mughan ne jaam uThaya iid hui mai-ḳhvaron ki
kitne hi dar khul ja.enge josh-e-junun ko baḌhne do
band rahega kya dar-e-zindan ḳhair nahin divaron ki
kafir-e-ishq samajh kar ham ko kitne tufan uThte hain
dil ki baat ko kis se kah den basti hai din-daron ki
pas-e-adab se ik ik kanTa ham ne chuna hai palkon se
aḳhir kuchh tazim thi lazim dasht-e-vafa ke ḳharon ki
kitne dukh ke din biite hain is ka bhi tha hosh kahan
apne haal ko kuchh samjha huun surat se gham-ḳhvaron ki
zulf-e-pareshan raaz ki juuya bad-e-saba yaksar ghammaz
baat tiri ḳhalvat tak pahunchi ham vahshi avaron ki
mausam-e-gul ki rana.i ne dasht men Dere Daale hain
tum bhi ‘ravish’ ab ghar se niklo rut aa.i hai baharon ki
Leave a Reply