Daur-E-Sbuhi Shola-E-Mina Raqsan Chhanw Mein Taron Ki

daur-e-sabūhī shola-e-mīnā raqsāñ chhāñv meñ tāroñ kī

pīr-e-muġhāñ ne jaam uThāyā iid huī mai-ḳhvāroñ kī

kitne hī dar khul jā.eñge josh-e-junūñ ko baḌhne do

band rahegā kyā dar-e-zindāñ ḳhair nahīñ dīvāroñ kī

kāfir-e-ishq samajh kar ham ko kitne tūfāñ uThte haiñ

dil kī baat ko kis se kah deñ bastī hai dīñ-dāroñ kī

pās-e-adab se ik ik kāñTā ham ne chunā hai palkoñ se

āḳhir kuchh tāzīm thī lāzim dasht-e-vafā ke ḳhāroñ kī

kitne dukh ke din biite haiñ is kā bhī thā hosh kahāñ

apne haal ko kuchh samjhā huuñ sūrat se ġham-ḳhvāroñ kī

zulf-e-pareshāñ raaz kī juuyā bād-e-sabā yaksar ġhammāz

baat tirī ḳhalvat tak pahuñchī ham vahshī āvāroñ kī

mausam-e-gul kī rānā.ī ne dasht meñ Dere Daale haiñ

tum bhī ‘ravish’ ab ghar se niklo rut aa.ī hai bahāroñ kī

Leave a Comment