qulir-ruho min amr-e-rabbi
un logon se jo ye samajhte hain ki har baat lafz se shurua hoti hai
main aaj un ko chhodne aaya huun
thiik us jagah pe jahan se koi lafz shurua nahin hota
sirf chand ankhen hoti hain in ankhon ankhon ko rakhne ke kai hava hava main dolti hain
sirf chand ankhen hoti hain asman ke chhote se tukde ko utaar kar der tak gunjti rahi
sirf chand ankhen hoti hain jo intizar karti hain ki koi un men utre
aur in se kahe ki chalo ham tumhen phir se pedon aur parindon se abad kar den
chalo phir se tumhen be-laus mohabbat ki jalvaten aur khalvaten bakhsh de
so ye mera qissa hai ki main ne utarne ki rivayat ka bada ehtiram kiya
khud ko bhuul dusron ka kaam kiya
ye abhag un ka tha ki unhon ne mujhe pahchana nahin
main koi aur raah ho leta par dil maana nahin
main bahut paas se guzra tha
dil hi dil men jo umr bhar lahrati hai zaban par kabhi nahin aati
is mausiqi ka lams ban ke main bahut paas se guzra tha
main bahut paas se guzra tha
aur meri aamad ke arsa men zamin ki ab-o-hava
neki-o-badi khubsurti-o-bad-surti sab se be-niyaz thi sarapa raaz thi
aur gyaan ek jaage hue dil ka naam tha
savalon se be be-niyaz javab na-tamam tha
khuda se milti jalti aadmi ki mohabbat
bichhdi hui azal ki neamat
har-chand ki hasil-e-abad hai
aur be-niyaz nek-o-bad hai
phir bhi nazar men aadmi ki auqat
aur duniya jo jism-o-jan ki had hai
aur ke haqir raston men tum mujh se shairi ka matlab puchhte ho
main nahin bata sakta main kyuun bataun main nahin batata
ye qissa meri dehati ankhon mere dehati dil ka hai
jab bahut bahut ghani raat men musafir ke paanv tale rasta nahin hota
tab vo kis anokhe sitare se rasta puchhta hai
tab kaun sa ishara musafir ke paanv ko tarik kar dene ki shart batata hai
ped ki phalangi par mahokha bolta hai
paani ki zaban janne vaali titihri ki chonch se din nikalta hai
tum nahin bata sakte tum ne kabhi nahin bataya tum kabhi nahin bataoge
tumhari abadiyan akaal men mare hue logon ki bad-duaen hain
maazi haal mustaqbil tiin andhe faqiron ki sadaen hain
main tum men shamil-e-safar huun magar panah mangta apni ajal ko dhundhta huun
aur jo apni ajal ko dhundhta hai
tumhari duniya us ka kuchh nahin bigad sakti
magar main aise ahd-e-ba-asar men huun
ki jis ki har sada sada-e-be-asar hai
aur guftugu ka ped be-samar hai
khuda se kar chuke hain jo kalam vo kalim apni bazgasht chhod ke chale gae
aur khak-e-baz-gasht aaj
ud rahi hai iltibas men
aur vo khamushi thi jo mahan aatma ka ramz thi
aur us ki aankh sabz thi
phir bhi soch ke ji darta hai
phir bhi soch ke ji darta hai
jaane vaale aane valon ko aisi hi aas bandhate hain
haath nahin aati hai amar-lata
yahan pahunch kar main sochta huun
yahan pahunch kar main sochta huun
mujhe aansu kis ne diye
aur kaun sa aansu mere virsa ka batin hai
kis se bichhad kar mitti paani banti hai
nadi akeli bahti hai
duniya chhod ke kaun samundar ki tah men baith ke likhta hai aur apna qalam dubota hai
jis pul par chal ke kahne vaala sunne vaale tak pahunchta hai
vo ek aisa sach hai jise maut zindagi se chhup kar bolti hai
insani dil ki shakl se milte-julte kheme ab bhi jalte hain
Leave a Reply